‘إنتي لابسه Tommy زيي’
تعليق غريب من واحد لبنتي الصغيرة اللي الT-Shirt بتاعها مايكملش ٣٥سم و عليه logo صغيييييير مفعس بتاع Tommy (علم صغير اوي كده).
الليزر اللي في عينه شاف اللوجو على T-Shirt البنت اللي مش مكمِله طول ركبته!!!
لما إشتريت الT-Shirt ده لبنتي كان عاجبني شكله و لونه (وإلا ماكنتش حاشتريه اكيد) و كان عاجبني اكتر إن الlogo مش باين عليه. لو أطول اشيله كنت شيلتُه!
من مظاهر الفشخرة في مصر إن كله لابس Brands!!!
كُللله!!! 😳
انا سبت مصر و كان الناس يمكن بتلبس حاجة واحدة بس ماركة، شنطة، قميص..ارجع الئيكم مطأمين من ساسكوم لراسكم كده؟😄
من إمتى الBrand هوا اللي بيعبر عنك؟ نِفسك تقول إنك غني و معاك فلوس؟ ولا لبسٓك للBrand بيخليك حاسس إن ليك قيمة؟
ليه اشوف بنت ١٢ سنة ماسكه شنطة Michael Kors امال لما حاتكبر حتمسِك إيه؟
إلا لو أستاذ Michael Kors (ال انا بحب كتير من حاجاته) عمل Kids Line و انا مِش عارفه!! بس لأ، دي شنطة واحدة كبيرة مش فتفوتة عندها ١٢ سنة..
انا مش ضد الBrands إطلاقاً. انا بحب البسها بس مش لازم الlogo يبقى واضح على كل فتفوتة لبس انا لابساها. ولا لازم كلللل حاجة البسها او امسكها تبقى brand.
دا ناقص (excuse me يعني) تبقى فانلتك الداخلية brand عشان لا قدر الله لو قلعت محدش يفتكر إنك ‘ياااي’ مش لابس brand ولا حاجة.
حصلكم إيه يا مصريين؟!
لو لابس brands في كُل حاجة و شخصيتك منيلة، مالٓكش تلاتين لازمة. محدِش حيحبك. محدش حيكون الصديق الوفي ليك. كل اللي حواليك دول (بالبلدي كده) حيقلبوك اول ما فلوسك او مركزك يروح او لو لاقوا حد تاني أغنى منك.
الbrands مش هيا اللي حتخليك بني آدم محبوب.
جرب كده اخرج بلبس مِش brand و شوف حتحِس بإيه. شوف اللي حواليك حيتعاملوا معاك إزاي.
فاكريين 14 Fourteen اللي في الكُربة(مصر الجديدة)؟ كانت البنات بتقطع نفسها عليه 😄
على فِكرة، كل اللي مطقمين brands بشوفهم في الoutlets بره بيجيبوا الحاجة بنص التمن!
قصدي لو إضطريت تعِمل كده عشان المنظرة يبقى خسارة.
اشتري من الoutlet و انت مرفوع الراس 😊 طالما عجبتك الحاجة و قادر على تمنها
الحاجة الحلوة إن المصريين كتير منهم ذوقهم حلو في اللبس (مقارنةً ببره..معظمهم جرابيع في لبسهم). حتى المصريين اللي على قد حالهم برده فيهم كتير ذوقهم ظريف. تلاقي البنت لابسه إيشارب لايق مع البلوزة اللي لابساها و ماسكه شنطه ماشية مع اللبس. بجد Bravo
كلمة أخيرة لازم اقولها: العِفش عِفش مهما لِبس!!
#فيها_حاجة_حلوة #فيها_حاجة_زفتة