٧ أيام في الأردن
اليوم التالت: Petra
قمنا الصبح بدري و طلعنا على Petra..حوالي تلت ساعات من عمَّان. بسمع عنها من زمان و عن قد ايه هيا منطقة أثرية جميلة.
كله قالي المشي و طلوع الجبل فيها كتير فعملت حسابي و لبست لبس الصعقة بتاعي.
عند شباك التذاكر، الأسعار كالآتي؛ الأردني بيدفع دينار واحد و الأجنبي بيدفع خمسيييين دينار(يعني حوالي خمسميت جنية مصري) 
بتوع التذاكر كانوا جدعان..عرفوا إننا مصريين فدفعونا تلت دنانير للواحد.
في كل الأماكن السياحية اللي زورتها..كان بيعاملوني زي الأردنيين و يدفعوني فتافيت، دا غير ‘المصريين دو إخواتنا، مصر أم الدُّنْيَا..’ انا حبتهم اوي. بقالي كتير ماحستش بقيمتنا كمصريين!!
و إبتدينا رحلة المشي وسط الجبال العالية و المدقات الوعرة..
تلت ساعات و نصف مشي، رايح بس one way، منهم حوالي ساعة و نصف طلوع ٩٥٠ سلمة مكسرة اما رحلة النزول و الرجوع بتاع ساعتين. Workout العمر..انا مش عارفة امشي مظبوط بقالي يومين. ولا انا ولا جوزي. اللي يشوفنا ماشين مع بعض من بعيد و احنا بنعرج يقولك سبحان من وفق!
يعني لو انت معندكش اي نوع من انواع الfitness ماتروحش احسن او حضر نفسك تدفع مبلغ محترم عشان تركب جمل او حمار او بغل عشان يوصلوك لقمة الجبل.
