قابلنا مشكلة كبيرة لما جينا نعمل Check in في الأوتيل اول إمبارِح. كنا وصلين بالليل بعد يوم طويل و مُجهد في Petra. كلمناهم من هناك اكدنا ميعاد وصولنا للأوتيل. وصلنا الأوتيل مدغدغين الساعة ٩:٣٠ بالليل و إحنا بنجر رجلينا.
الأوضة جاهزة؟..لأ مِش جاهزة!!
“حتنتظروا معانا ٤٠ دقيقة” اللي هوا بالتوقيت العربي ساعة..او اكتر
جوزي هب فيهم و قالوهم إزاي يعني الأوضة مش جاهزة الساعة ٩:٣٠ بالليل. بتعملوا إيه طول اليوم؟
الأوتيل اصلاً فاضي..داحنا حتي يوم التلات، اللي هوا مش يوم اصلاً!!
هات و خُد، وصلنا معاهم إنهم حيدونا أوضة تانية نبات فيها الليلة دي لحد ما يجهزوا أوضتنا بكرة الصبح. آل يعني بيجهزوا الـHoneymoon Suite
و بتنا في أوضة تفتح بلكونتها تلاقي تندة داخلة في وِشك. من كُتر التعب، كان اهم حاجة عندنا إننا ناخد دُش و ننام فإتخمدنا فيها و خلاص.
عدى عليهم جوزي تاني يوم الساعة ٢ الضهر.
“عايزيين ننقل الأوضة بتاعتنا”
“أوضة إيه؟!!”
ناس في الضياع..
جوزي شرح..
“إتفضل حضرتك إستريح عقبال مانجهز الأوضة”
بذمتكم لو إنتم مكان جوزي حاتعملوا إيه؟
جوزي قالهم انا عايز الأوضة حالاً. جابولوا أوضة على طول..جنب الأوضة اللي إحنا فيه بنفس التندة اللي داخلة في وشك اول ما تفتح الباكونة
“إيه ده..أنا طالب و دافع أوضة Sea View”
“ماحنا عملنالك upgrade و إدينالك الأوضة دي”
جوزي فتح فيهم و كان قرب يسبلهُم.
عُمر حد شاف أوضة بـview تندة تبئا upgrade لأوضة seaview؟!!
شوية إستعباط منهم على إستهبال، جوزي تحول عليهم لـHulk و طلب مقابلة الـ GM
ضاع من عُمرنا و من أجازتنا قد إيه دلوقتي؟ ساعتين..ساعتين عشان ناخد أوضة.
وفين الـ GM؟ في meeting إستنوه ساعة كمان
الهدوء مطلوب في الحالات دي..كرهونا في كل لحظة إستمتعنا بيها في الأردن!
نقلونا أوضتنا بعد ما جوزي قفش عليهم واحد واحد..أوضة من غير صابون ولا شبشب و فوط ناقصة..في الأخر دي كلها luxuries، ممكن الإنسان يعيش من غيرها. ليه تلبس شبشب لما ممكن تمشي حافي؟ ليه تمسح في فوطة لما ممكن تمسح إيديك في هدودمك؟ اما الصابون..فدا حرام!
رمينا حاجتنا في الأوضة و جرينا نلحق شوية وقت على البحر و رجعنا لقيناهم سيبنلنا طبق فيه ٣ تفاحات و موزة، آل بيرضونا بيه! على فكرة إحنا إتنين..يعني محتاجين موزتين..لأ خلاص حانقسِم الموزة على بعض..زيها زي البشكير اللي حانشف فيه إحنا الإتنين. ماهو الجواز إيه إلا مشاركة.
و ظهر مساعد الـ GM تاني يوم عشان يقابل جوزي و يفهم منه اللي حصل.
“قالولي إن حضرتك بتشتكي من ريحة الأوضة”
ريييحة؟؟ لا لا..دا حتى الـcommunication ضايع عندهم.
و بعد ما جوزي شرح..رد عليه مساعد الـGM
“بس حضرتك معمولك upgrade للأوضة”
أم تندة؟؟؟؟
الناس دي شكلها عمرها ما داخلت أوتيلات قبل كدا
“انا حاعمل investigation و ابئا ارد عليك”
!!!!
إنت ليسه حااااتعِمل investigation؟ إحنا ماشيين كمان يوم و نص على فِكرة
قررنا انا و جوزي مانحرقش دمنا اكتر من كدا و حاولنا ننسى الموضوع خصوصاً بعد ما راضونا بتلت تفاحات و موزة واحدة بس.
لكن..اللأوتيل ده كان فيه حاجة حلوة؛ من اظرف الناس اللي قابلناها هناك “مُنتصر”، المسئول عن المطعم. منتصر كنت بشوفه على العشاء في المطعم و بعدين اروح الكافيه الـoutdoor بتاعهُم الاقي بردوا منتصر، نفس الـ منتصر!
و اخش انام و اصحى تاني يوم الاقي منتصر بردوا على الفطار..منتصر في كل مكان و زمان
منتصر..إنت بتنام؟ ولا واخد مخدرات عشان تعرف تشتغل في كُل مكان في نفس الوقت..ولا هما مش لاقيين حد غيرك راضي يشتغل معاهم؟
لما أخيراً خادوا بالهم من اللي العك اللي عملوه فينا، عرضوا علينا ٤٥ دقيقة massage..منتصر بردوا اللي حايعملوا؟!
بس إحنا شكرناهم و مارضناش..كفاية الموزة و التلت تفاحات
اللي انا عارفاه و متآكدة منه إن لازم اي أجازة يحصل فيها حاجة غلسة ماهو مش لازم الأجازة تبقى كلها تحفة..لازم حاجة تبوظ في النص او قبلها او بعدها و لو على خفيف زي ما حصلنا كدا. طب نغزي العين إزاي ثلاً؟ دا مش تشاؤم..no no، دي حقيقة!
يلا، اهي جت في الأوضة و الصابونة.. و البشكير.. و الشبشب..بسيطة
