كنت عارفة و انا مسافرة نيويورك إني حاسكن في شقة صغيرة
و ده الطبيعي هناك لإتنين ليسه متجوزين (او لاي حد) إنهم يعيشوا في Studio (أوضة) او في شقة أوضة و صالة One Bedroom و لما يخلفوا او يتقدموا في حياتهم شوية بينقلوا شقة أوضتين نوم و صالة Two Bedrooms
مِش عارفة ليه إفتكرت موقف مِن أيام الكُلية و إحنا بندور على شقة في نيويورك
كنت واقفة مع مجموعة من الناس و كان بيتكلموا على الجواز. واحدة كان متقدملها عريس و كانت متضايقة إنه إزاي يتقدملها و هوا في رأيها مش مُستعد..
“لِيه عين يتقدملي و شقته ٧٠ متر بس؟!”
معرَفش ليه ليسه فاكرة الجملة دي اوي!
جوزي هوا اللي كان مُتولي مهمة التدوير على شقة عشان انا كنت في مصر بالِم حاجاتي و باخلص اللي ورايا قبل ما سافر. فكان بيبعتلي صور للشقق اللي بيتفرج عليها و انا باحاول أختار معاه!
كان ليا طلب واحد يكون موجود في الشقة..بلكونة
” بلللكونة؟؟!..حبيبتي، صعب..صعب جداً ألاقي شقة ببلاكونة”
“ليه، هيا الناس عندكم مابتقعدش في البالوكنات؟”
هوا انا طالبة قصر؟..دي بلكونة
واضح إني ماكنتش فاهمة إن فكرة البلكونة دي فكرة خيالية
طيييب 
كان قدامنا نوعين من الشقق:
شقق قديمة في عمارات قديمة و دي حتي لو جدِدوها، برضو شكلها مات من زمان!
بس اكتر حاجة كانت مضايقاني في الشقق دي، البلاط المربعات الابيض في إسود (اللي برده مات من زمان) اللي حتلاقيه في الحمام المنقرض او في الممر اللي قدام الشقق.
ليه..ليه نظام الشيوعية؟ ولا دا ستايل Style و انا مش فاهمة؟ 
يإما شقق جديدة في عمارات جديدة ليسه مبنية. و دي بتبقى أصغر في المساحة من الشقق القديمة
“على فكرة، الشقق هنا مافيهاش غسالة ولا دراير Dryer”
كماااان..يعني ولا بلكونة ولا غسالة و دراير Dryer؟ طب فيها حيطان ولا دا كمان Option؟
إيه دا؟ اومال الناس ليه مموتة نفسها على نيويورك كده؟
الغسالات و الداريرز Dryers يإما في البدروم Basement بتاع العمارات (مِش كُل العُمارات عندها غسالات) و كل السكان بيغسلوا في الكام غسالة اللي تحت (بفلوس طبعاً) يإما الواحد يروح مغسلة و يُعد جنب غسيله لحد ما يتغسل و ينشف.
يعني تضيع تَلت اربع ساعات من عمرك مستني جنب غسالة!!
دي شغالة ماما مِن أول الحاجات اللي جابتها لبنتها و هيا بتجهزها، الغسالة!
أنا انزل في عز البرد و التلج شايلة غسيل الإسبوع على ضهري و اروح أغسل؟! ليه؟ ليه يا ربي كده؟ هوا أنا عايشة في مركز ابو طشط نيويورك؟ دي نيويورك الMetropoltian City، اللي كُله بيتفشخر إنه عايش فيها!!
يعني مدينة نيويورك مش عارفة تُحط غسالات في الشقق؟ لما سألت قالولي اصلها بتعمل إزعاج..
دي كده شيماء بنت أم محمود الشغالة، هانم بئا!!
كلمني جوزي بفرحة عارمة في يوم و قالي ” لقيتلِك الشقة اللي نِفسك فيهااااا”
“لاااااااا، بجد؟؟!!” 
“ايواااا.. و فيها بلكونة”
مش قادرة امسك نفسي من الفرحة..شقة ببلكونة..أنا..أنا..فرحانة
“و مفجأأأأة تانية”
“إيه إيه؟!!”
“كُل دوووور فيههه…غساااااالة”
“ااااااااا..مِش ممكن”
قلبي الصغير لا يحتمل..
كَلبشنا في الشقة و خدناها رغم إن إيجارها كان أغلى من كل الإيجارات التانية. دي بردو الشقة اللي حانعيش فيها..نعيش مستريح بئئئا. مِش غُربة و عدم راحة
وصلت نيويورك و انا مبسوطة إني حأشوف جوزي و الشقة الجديدة اللي فيها بلكونة 
كانت شقة أوضة و صالة One Bedroom
فتح جوزي الباب و على طول إفتكرت الشقة اللي في مسرحية الهَمجي..هِيا هِيا!
“إيه رأيييك؟”
“جميييييلة اوي..”
“تعالي أفرَجِك عليها”
“…يلا نِتفرَج!!” 
الشقة غالباً كانت عبارة عن أوضة و حطُلها حيطة عشان يسموها شقة أوضة و صالة
مش قولتكم واضح إن حتى الحيطة Option
مش مهم، المهم إنها شقة جديدة و نضيفة و فيها بلكونة
و كام خطوة بعد ما أفتح باب الشقة الاقي الغسالة و الDryer
يعني مافيش أحسن من كده
الشقة كُلها كُلها بالبلكونة ٤٨ م
يعني البنت اللي كان مِش عاجبها الشقة ال٧٠ م كان زمانها أغمو عليها لو شافت شقتي!
شقتنا رغم صغرها الشديد، كانت ليها مزايا كتير..مثثثلاً:
“حبيبي، ممكن تولع على براد الميه؟”
يروح جوزي و هوا قاعد على الكنبة في الLiving Room مادِد إيده و مولع على البراد!
أصل البوتاجاز جنب الكنبة..كُله مع بعضه
“حبيبي، ممكن تفتح الشباك؟”
يقوم جوزي مادِد إيده فاتح الشباك اللي وراه على طول و هوا قاعد على نفس الكنبة اللي في الLiving Room برده
كُله في متناول اليد
الLiving Room هيا الصالون، هيا السفرة، هيا المطبخ في نَفس الوقت..كُله كُله في نَفس المكان عشان الواحد مايتعبش من الحركة الكتير
اكيد بتفكروا كنا بنعمل إيه لو عَملنا عزومة؟!
كنا بنُحشر ٧ رجالة في البلكونة مع الشيشة بتاعتهم، فبيفضلوا قاعديين فيها (دا في الصيف بس) وبئيت الناس في الLiving Room.
كنا دايماً مابنعزمش اكتر من عَدد معين و إلا كده كنا حانضطر نفتح الحمام للناس تقف فيه.
😀
😀
This is great writing
Thanks a lot Tamer 🙂
الله يسترك يا نصره الغلابه
المقال ده مناسب جدا لأي أتنين أتجننوا وقرره يتجوز فبلد أنتحر فيها المنطق ذي “جمهوريه مصرف العربيه”
مش عاوز احكيلك عن مدي المعناه والتريقه اللي بشوفها لما أقول لحد ان شقتي 106م بس!!
زي ماقالت لي قبل كده (أنا مجهز بنتي ب ٦ أوض يابني!)…وكأن مطلوب مني أخلف ٦ عيال في اول أسبوع جواز عشان يستمتعوا معايه بحق وشرف المواطنه المصريه الجميله !؟ اللي حتضمن ليهم التعليم ورعايه صحيه السوبر لوكس زي بره واحسن كمان 🙂
وبعدين أنا ليه أتملك المخروبه ديه وأدفع فيها اكتر من نص مليون!! (شقا ٨ سنين شغل ده غير ألاقساط !) معا أني عارف أن أخري أعيش كمان ٣٠..٤٠ سنه ده لو ماجاليش فيهم الضغط و السكر من التعامل مع الكائنات اللزجه اللي هنا.
وكأن فكره حق أنتفاع ٩٩ سنه أوالايجارأشبه بالجنون يا ولاد المجنونه 🙂
Hahahhaha hilarious ya Shahira 🙂 like your way & concept.
Can i share?! Maybe girls here in Egypt think differently :p
Hilarious as usual
والله انا بس بعد أفكر انى لو ولد وعايش في مصر مينفعش اتجوز اصلا بالشروط بتاعت البنات والأهل
عجبانى شقتك جدا 🙂
Great attitude, Wish you both the best of luck in the Big Apple.
I wish more young couple can fight the social agonies imposed by senseless traditions and find a moderate starting point to their lives.
😀 معندكيش أخت طيب؟؟
Thanks for sharing
مقارنة جميله ..الرضا نعمة محروم منها الكثير 🙂
كلام جميل وممتع وشيق بس انتي عملتي كده عشان بتحبي جوزك .. اغلب البنات بتقولك دلوقتي لو مش جه ده هيجي الاحسن منه .. عشان صالونات في صالونات اتبهدل ليه … بس جميل اوي جو الالفه والتدوينه جميله جدااا
عجبتني جدا المقاله دي
عندنا هنا ف مصر حاولت كتير اتناقش في نفس الفكرة دي
“ليه الاهل لازم هما اللي يبنوا البيت ! مفروض يسيبوا ولادهم يعتمدوا علي نفسهم ..او يجهزوا حاجة بسيطة جدا من متطلبات الحياه بس ممش لازم البذخ ده !!
ليه كل عريس جاي مؤهلات الحكم عليه دايما بتكون مقدار فلوسه ..برغم ان هو لو انسان مش كويس هايعتبر كده انه بيشتريها و هايبقا سهل عليه يشتري غيرها !!
ليه الشقة التمليك بقت متطلب اساسي من العريس ..بالرغم ان لو هو واحد في بداية حياته صعب جدا تكون عنده ..و لو هيستني لحد ما تبقا عنده يبقا مش هايتجوز اقل من 30 سنه ! و اما انه هايتجوز واحده فرق السن بينه و بينها كبير اوي ..او هايتجوز واحده كبيرة في السن ..و غالبا هايكون تعب من البحث و يتجز اي واحده و خلاص !!
المادية المفرطة هنا في مصر سبب كبير جدا من اسباب ارتفاع سن الزواج او بلفظ آخر مكروه “العنوسه ” !! و هي سبب تاني برضو في التسرع في الزواج !
من فترة كنت عند طبيب الاسنان ..سمعت حد بيصرخ ..شوية و الممرضة خرجت و قالت اصلها حامل و بيخلع لها منغير بنج ! ..الحامل دي عندها 15 سنه !! طبعا بدون عقد زواج يعني يعتبر عرفي ! و بتيجي كارثه تانيه عند تسجيل الابناء و بتنتهي غالبا بان اولادها بيتسجلوا باسم ابوها -يعني يبقوا اخواتها !- او مايتسجلوش خالص و تبقا كارثه اكبر !! …و مشاكل مالهاش عدد!
و اسباب الاهل دايما تتلخص في “الخوف” ..
الخوف من ان البنت تعنس ..فايجوزوها صغيرة او لاول عريس معاه فلوس يجي !
الخوف من العريس اللي جاي ف عايزين يطمنوا علي بنتهم ف يربطوه بالفلوس ! برغم انه لو معاه فلوس كتير فالفلوس مش هاتكون بالنسباله عائق !!
الخوف الخوف الخوف …مجتمع “عادات و تقاليد ” مش “دين ” …لان مفيش حاجة في الاديان بتنص علي البذخ ده كله !
احييكي علي كتابه رايك بصراحه 🙂 و اتمني اي حاجة تتغير 😀
هاتابع كتاباتك دايما ان شاء الله 🙂
Greetings
Very good article
The most important thing in marriage is happiness. Happiness can be obtained no matter what the financial status is. Every woman should ask herself: “What is important when marrying a man? The man himself or the man with the stuff he needs to buy”
You answered this question already and I happy to see women with such mentality. May ALLAH bless you, your hasband and your marriage more 🙂
super like 🙂 u made my day 🙂
كلام صح مية في المية ومش من حق البنات تزعل .. لازم يحسوا باجوازتهم … لان الحياة الزوجية تحديدا مش عفش وشفه كبيرة وكلام فاضي … الحياة الزوجية اكبر من كده بكتير … لو مكانش في ود وتفاهم واحتمال الاخر والرضى يبقي العفش والشقه الكبيرة مالهاش اي لازمة ..تحياتي للكاتبه اسلوب رائع استمري
جميل جدا الشجاعة اللي انتم فيها ومشيكم عكس التيار واظن ان السبب في اللي احنا فيه ف مصر الإستمساك بالعادات اللي ورثوها عن اهاليهم من غير تفكير .. ربنا يوفقكم وللأفضل ان شاء الله
أنا والله كل اما أقول لحد الكلام ده يقولو عليا مجنون 😀
i really want to share it with all the Egyptian girls and the Egyptian society
the society is suffering because of marriage requirements according to 50’s & 60’s People !
i faced myself too many strange ideas !
i.e don’t come back again to Egypt without the US passport.
نفس المشكله اللى واجهتنى اول ما جيت بس يا بختك لقيتى بلكونه هههههههههه
هو ليه الناس مش كلها زيك كدا طيب 🙂
First of all, this flat called two rooms in the country I’m living in right now
Sweety, I’m so proud of you
Shahira, this is hilarious 🙂 it’s funny that I, too, noticed the non-balcony side of NYC and got shocked at first. Heyya el naas di beteahrab shay feen summer nights :D?
Keep writing!!!
very good article, i like it and i hope all girls learn from your opinion not girls but men also
العش بتاعكم أكتر من رائع
ربنا يملاهولكم بركة 🙂
hayla, I am sharing the same experience mesaleyani fil ghorba keep it up
This is simply amazing, as if I am reading my own story, we had moved to Boston 2 years ago, me, my hubby & my little 4 years old spiderman, I left behind my luxurious apartment, we decided to start brand new here, we took the risk & btw am a doctor & my husband is an IT eng
we have here a one bedroom apartment,with the simplest furniture & no washing machine or dryer
Hi Shahira, ana Heba, from Alexandria, and your neighbor in Canada (Montréal):))). You made me laugh to tears walahi. Same thoughts and experience I had 12 yrs ago :), lazem balkona odam el ba7r ..hahahah. keep writing , you lighten up ghorbetna.
Best of luck…PS:My french is fluent like Kazem :). Merci
ياريت كل البنات بنفس التفكير
kan nfsy bgd f 7d yt2bl fkrty 3n el gwaz w enha msh be3a w shrwa w en bgd lw mafesh msha3r w e7sas bl a5r lw 3aysh f 2sr msh htb2a mabsot ana rafda tmamn gwaz el salonat l2no bebasata zai el shopping btlf 3l m7lat w t7awl tla2y 7aga 3la m2ask w 3la zo2k w da byb2a s3b w kolna kbnat 3arfen y3ny eh shopping 🙂 mab7al btdwr 3l shrek 7iatk!!!
3la tol 5en2aty m3 mamty bsabb enha btgebly 7agat w tshelha 3la aml eny atgwz w msh adra awslha en kol da msh howa elly hys3dny 2d eny ala2y bgd el ragl elly a3esh m3ah fl 50mtr bs sa3eda w radya w mst7mla w tkon a7la ayam 7yatna sawa w b7md rabena en gwaz el 3fya msh mwgod 3ndena w 3shan 3ndy 3ela mo7trma msh bsm3 klmet 3ans 😀 w kol elly by3mloh enhom yd3oly ala2y elly yry7ny w ybstny, klamk bgd nwr el dlma elly bd2t td5ol 2lby l27sasy eny msh lw7dy mgnona wla b5rf lw rafda el 3adat w el tkaled el 8lt elly lsa f mogtm3na