نزلت مشوار في مصر الجديدة، سايقة عادي و فجأة لقيت اختي بتزعألي ‘ كسرتيييي الإشارة’
إشاااارة؟! فين الإشارة؟!!!
قعدت أبص و الف و أدّور على الإشارة، مش شايفة حاجة.
فيييين الإشارة؟!
إتخضيت. حسيت إن عملت كارثة.
و هِديت بعد لحظة و فكرت..
طب لو انا كسرت الإشارة، العربيات اللي ماشية جنبي دي بتعمل إيه؟ بترّوِش؟!!
ولا الناس بئت تكسر الإشارة مع بعض كنوع من انواع الفَنفَنَه (fun يعني).
ولا دا كمين عملينوا للناس عشان يلموا مخالفات؟! ولا إشارة قديمة و مترّبة و نسيوا يشيلوها؟
بعدين انا بقالي سايقة اكتر من تلت ساعة، معدتش على ولا إشارة.. كلها U Turns و لو جِه تقاطع، يا بعّدي بلطجة ..او ..بالتصوير البطئ اتزلحق لحد ما أعدي، يااا حد محترم بيعديني.
السواقة في مصر بتصيب الواحد بنوع من الإنتعاش..ايوااا، خلينا مؤدبين..هوا إنتعاش.
و رغم كل ده، بنتظر إن أسوق شوية في مصر كل اجازة. في روح adventure كده وكمااان بِدّرب سرعة رد الفعل عندي من كتر الحاجات الغير متوقعة اللي بتحصل في الشارع زي:
– واحد معدي على رجليه في شارع سريع.
مش عارفه بيفكر في إيه و هوا بيعمل كده! ‘يا ترى اموت النهارده مدهوس تحت اتوبيس و لا منطور و متكسر من عربية وحشة ماشية في طريقها عادي؟ ولا اموت و اموّت اللي سايق العربية (و يمكن اللي معاه) و أدينا إستريحنا كلنا من الدنيا دييييي؟
– واحد بيستظرف و ياخد كام غرزة ورا بعض..اصله واد cool و محصلش
– ميكروبص Microbus يوقف على مطلع او منزل الكوبري. مخلاص، دا بئا موقفهم.
– تاكسي يقف فجأة في اي مكان عشان ينزل حد. و الحد دا منفسوش ينزل على الجنب في حتة أمان ولا إيه؟!!
بعض منا عنده مهارة السواقة و البعض الآخر (و دول كتير جداً) حافظ إزاي يسوق، مش فاهم.
القيادة مهارة و إتباع تعليمات، مش فهلوة ولا فتونة.
و أخيراً أحب اقول: الله يكون في عون اللي بيسوق لشغله كل يوم، يا ترى بتعرف تشتغل بعد الفرك و هري الأعصاب ده؟
اما اللي بيركب مواصلات هنا فدا بيتكتبله حسنات كل فيمتو ثانية..
Leave a Reply
You must be logged in to post a comment.